Tiedens zien eupeningswoord leut veurzitter Ype Dijkstra van de Stellingwarver Schrieversronte, uutgever van et boek, weten slim inneumen te wezen mit de ni'jste uutgifte van zien stichting. Netuurlik hadde hi'j veurofgaonde an de prissentaosie al even kennis nemen kunnen van et boek. Dijkstra vun de verhaelties hiel lezensweerdig, ze zetten je zeker even tot naodaenken an. Ok prees Dijkstra de inzet van de schriever veur et Stellingwarfs, zo is Schonewille o.e. vaaste vri'jwilliger van de jaorlikse sutelaktie. Woorden van lof hadde Dijkstra ok veur et omslag van et boek.
Nao de eupening gong et hiele gezelschop, zoe'n tachtig belangstellenden, mit mekere naor de karke van Berkoop. Daor wodde, naodat Schonewelle een tal verhaelen uut zien ni'je boek veurlezen hadde, et eerste exemplaor overhaandigd an domenee Grietje Martens. Zi'j is as domenee verbunnen an de karkgemienschop van Oolde- en Ni'jberkoop, mar ok oold-studiegenoot van de schriever.
Domenee Martens stelde et arg op pries dat zi'j et eerste exemplaor in ontvangst nemen moch en vertelde vervolgens nog een peer aorige anekdotes uut de gezaemelike studietied in Kaampen. Mar domenee Martens leut ok weten hoe belangriek zi'j et vint dat et Stellingwarfs ok op disse meniere bruukt wodt.
Nao de prissentaosie gongen de geneudigden weeromme naor et gebouw van de Schrieversronte, waor onder et genot van een glassien drinken nog een hiel posien naopraot wodde, én waor de gelegenhied was veur et anschaffen van et ni'je boek en et signeren laoten d'r van.